ريــحة .،. البراءهـ .،. !!!

**أنثى المطر** · رقم المشاركة : ( 1 ) 3 - 6 - 2008, 07:15 AM

}{ .. مدخل : :
// ياليت ان الزمن يرجع ورى ولاالليالي تدور .،.
ويرجع وقتنا الاول وننعم في بساطتنا .،. !

صباحكم // مساكم .،. طفولهـ .،.

وش احلى من الطفوله وبرائتها اياااام يحن لها اكيد كل واحد/هـ فيكم
** حبيت انزل هالموضوع يقرقع بخااطري منذو مبطي **
ودي اعرف هو انا بس اللي تجيني ذا الطواري
ولا فيه احد مثلي ؟؟ !
// زمان اول احس انه زمان فيه صدق شعور .،.
نحب ونخلص النيه وتجمعنا محبتنا .،.
بصراحه لي فتره وعموماً انا على طول احن واتذكر الماضي واتمنى ارجع اعيش ايامه .،.
يعز علي كل شي تغير في حياتنا الناس .،. الشعور .،. الاحساس !!
* فيه ناس يعيشون لماضيهم يتذكرونه في كل لحظه يقارنونه دووم بحاضرهم ويعذبهم
هالشعور .،. لاني منهم حاسه بكل كلمه كتبتها .،.
* وناس عايشين ليومهم وبس يعني يعيشون كل لحظه فيه كانها ماراح تنعاد عليهم .،.
اباكر ولا بعده واعرف كثير من ذا النوعيه ومروا علي واغبطهم من جد .،.
* وناس ماادري ليش عايشين مع احترامي لهم .،.
تخيل انك لو تسال احد منهم : //
* تذكرين هذاك اليوم وذكرياتنا ياااه ليته ينعاد امانه وش ودك تسوين لو يرجع .،.
ايش بيكون شعورك ؟؟
بتقول لك ://
* اي يوم حمد لله انا مااتذكر ايش تغديت اليوم عشان اتذكر هذاك اليوم وذكرياتنا !!!!
هذولي النوعيه عايشين حاضرهم بدون ماضي يعني ماعندهم احساس باي لذه عاشوا
نشوتها بماضيهم .،.
يناظرون للمستقبل وبس .،. عايشين للي جاي .،. واللي فات انمحى من شريط
حياتهم .،. كيف الواحد يقدر يدفن ذكرياته بسهوله .،.
ومع هذا هم اللي عايشين !!
لانه العذاب النفسي اللي انا اعيشه وكل من يحس بنفس احساسي هو اللي
يسيطر ع حياتنا .،.
مع انه حلوو هالشعور الا انه يأسرك .،. يقيدك .،. يوصلك لدرجه تكره فيها حياتك .،.
وتبدى تفقد كل معنى للاحساس باي شي يدور حولك .،. !!
ويكون دايم في بالك وودك ترجع للي مضى وللاسف
مابيدك ترجع له ولاتنساه .،.
يااااه قد ايش اتمنى ارجع طفله مااعرف شي مع انه كنت اشوف نفسي
انا افهم وحده
وما يمشي علي اي كلام واتذكر مواقف كثير مثل //
اذا شفت امي وابوي يسولفون يعني بتشفير عشان ماافهمهم اقوول :
ياحرام ع بالهم اني ماادري شيقولون لا انا عارفه كل شي بس اسوي
نفسي مو فاهمه << وانا من جنبها
// صغار قلوبنا بيضا نعيش بعالم محصور .،.
ولانعرف ابد اغراب ماغير عيال حارتنا .،.
// صحيح صغار في التفكير ولكن ماعلينا قصور .،.
نخطط نكسر اللعبه وتسعدنا شقاوتنا .،.
أول مادرسنا طبعاً فترة التمهيدي " الروضه " .،.
تدرون اني اذا شميت ريحة عصير التفاح يطرى علي يوم كنت بالروضه .،. !!
كانت فسحتنا عصير تفاح وتوست فيه جبن سليس ..!!
ماانساه ابد وربي كل ماشربت عصير التفاح لازم اشم ريحته قبل لا اشربه .،.
تجيني نشوه بداخلي .،.
تحيي فيني شي فات من حياتي مر وانتهى وتعيشني فيه من جديد .،.
لدرجة احس بنفس احساسي يوم كنت طفله !!
* غريبه كيف للبراءه والطفوله ريحه تذكرك فيها .،. ودي اعرف ليش ؟؟
لما قريت عن حاسة الشم عرفت انه هذي الحاسه هي اقوى الحواس .،.
" سبحان الله " !!
تصدقون انه للمسٌاحه ريحه .،. ماابالغ ان قلت اذا شميت ريحتها
وهي جديده يوجعني قلبي .،.
احن لايام قبل يوم ومي تسوي شعري .،.
افطر والبس شنطتي .،.
واطلع برى احتري الباص .،. وقبل لااروح اقطع ورده لأبلتي وافرحها فيها .،.
بأيام كانت البراءه هي حلاوة طفولتنا .،.// نروح المدرسه بدري ونضحك داخل الطابور .،.
نحاول نزعج العالم في روحتنا وجيتنا .،.
// وعشان ناخر الحصه نخبي علبة الطبشور .،.
نشاغب بس في الاخر تميزنا براءتنا .،.
// نحب الضحك والهيصه نحب ننط فوق السور .،.
نفرفش ليه مانفرفش مادام الضحك عادتنا .،. !!!
//
ولكن كيف هالدنيا تغيرت .،. ولا الناس تغيروا .،. وين الشعور اللي كنا نحسه ومحسسنا
انه احنا بالوجود !!
* ودي اعرف احساس كل من يقرا موضوعي في هذي الايام وش يحسوون فيه ؟؟!
يعني انا بالنسبه لي كانت احلى مراحل حياتي
يااااه كنت عايشه بكل مافيني .،.
// ولكن دارت الايام وبان الخافي المستور .،.
وصار الهم متعلي ع قمة سعادتنا .،.
// كبرنا وصارت الدنيا تصف احزاننا بالدور .،.
وتهدينا الالم والهم غصب عن عين رغبتنا .،.
// تعبنا من بلاوينا احد غارق واحد مقهور .،.
وكلن غارق بهمه وفي الاخر تشتتنا .،.
* بالنهايه اتمنى اني مازدت الجرح جرحين .،.
ولكن وش احلى من الذكرى .،. مع انها تهد الحيل .،.
ودي كل من يقرى بعثرتي يجاوبني ع السؤال اللي محيرني ؟؟!
// هو انت /ي .. تحسون باللي احسه وفيه اشياء بمجرد ماتشمون ريحتها ترجعون
لورى سنين ؟؟ //
// زمان مافيه لاغيبه ولاحتى نفاق وزور .،.
ياليته بس لو يرجع ونسترجع طفولتنا .،. !!

**ملك الرومنسيه** · 3 - 6 - 2008, 09:59 AM

أختي العزيزه أنثى المطر

رائعة الحرف

متميزة الكلمه

مبدعة الوصف

((يا قلب المنتدى))

يسرني بان اكون هنا

بين همسك وجمال حرفك

بين روعة الطفوله وذكرياتها

همس لم نتعوده الا منك

كلمات ذات معاني لا يكتبها الا انتي

صور معبره لا يرسمها الا انتي

لكي أختي العزيزه أنثى المطر((أطيب قلب)) اسجل اعجابي

لكي اسلم قلمي واورقي

لكي ودي وودادي

**Never Ever** · 3 - 6 - 2008, 11:06 PM

اجمل مرحلة بحياتي مرحلة الطفولة ...لوبيدي ارجع الزمن لورى يااريت كل حاجة كانت حلووة ...في حاجات كثيرة ترجعني لطفولتي مرات كيكة كنت اكلها وان صغيرة مرات لعبه بالملاهي...(ليت الزمان يعود يوما)يعطيكي العاافية انثى المطر أحلى انثىى........

**أنثى المطر** · 4 - 6 - 2008, 04:35 AM

أخوي ملك .......
أحرجتني بردك الرائع أخوي
مشرفني مرورك العطر
والله لايحرمني منك يارب
منور صفحتي
//////////////////////////////////////////////////////////////

هلا وغلا فوفو أفنان
الله يعافيك حبيبتي
مشرفني مرورك

//////////////////////////////////////////////////////